انصار: ( د تله ۲۸مه)، اندونیزیا او قطر هغه موافقه لاسلیک کړې چې، له مخې یې افغان محصلانو ته د اندونیزیا په پوهنتونونو کې د زده کړو لپاره بورسیې ورکول کېږي.
د اندونیزیا د بهرنیوچارو وزارت د وېب پاڼې د خبر له مخې دا موافقه د اندونیزیا د بهرنیو چارو وزیرې ریتنو مرسودي، د نړیوالو اړیکو په چارو کې د قطر د دولت له وزیرې لولوُ الخاطر سره لاسلیک کړه.
د دې موافقې له مخې د اندونیزیا په پوهنتونونو کې د افغان محصلانو د بورسیو لګښت د قطر حکومت ورکوي.
خبر زیاتوي چې مېرمن ریتنو په افغانستان کې زده کړو ته، په تېره د ښځو د لاس رسي پر اړتیا ټینګار وکړ.
اوس مهال نژدې شل تنه افغان محصلان په اندونیزیا کې لوړې زده کړې کوي.
اندونیزیا ویلي چې، په نورو برخو کې یې هم له افغانستان سره مرستې کړي چې د ماشومانو د ګوزڼ د ناروغۍ یا پولیو پر ضد د واکسین لس میلیون دوزه، د طبیعي پېښو د زیانمنو لاس نیوی او له روانو حالاتو اغېزمنو شاوخوا ۴۰۰ ښځو ته د رواني ناروغیو خدمات په کې شامل دي.
URL تعقيب: https://www.ansarpress.com/pashto/33976
